ҚПЛ-дың экс-легионері – Кенжебек туралы: ол бүкіл елдің мақтанышына айнала алады

«Жеңістің» бұрынғы жартылай қорғаушысы Василиос Карагунис ASnews.kz сайтына берген сұхбатында 2024 жылы елордалық клубта бірге ойнаған Қазақстан құрамасының жартылай қорғаушысы Ғалымжан Кенжебек туралы пікірімен бөлісті.

«Шынымды айтсам, мен оған бірінші күннен бастап сендім және біз бұл туралы үнемі айтып отырдық. Ғалымжан керемет прогресс жасады. Оның таланты айқын көрініп тұр, бірақ әлі де жетілдіруді қажет ететін түстары бар. Еуропаға көшкеннен кейін ол осы олқылықтың орнын толтырса, ойында шешуші рөл атқаратын болады.

Оның болашағы жарқын. Үздіксіз еңбек ету арқылы ол ірі турнирлер мен үлкен клубтарға бара алады. Бүкіл Қазақстан оны мақтан тұтатын болады», – деді Карагунис.

Грек футболшысы Кенжебектің «Олимпиакосқа» ауысуы туралы да айтты.

«Олимпиакос» ол үшін тамаша нұсқа болуы мүмкін. Онда өзін көрсеткен көптеген ойыншылар кейіннен мықты клубтардан ұсыныстар алды. Бұл, әрине, қарастыруға тұрарлық нұсқа», – деді жартылай қорғаушы.

31 жастағы Василиос Карагунис 2024 жылғы маусымның екінші жартысын «Жеңісте» өткізді (13 матч). Грекиялық жартылай қорғаушы кейінірек Косоводағы «Фероникели 74» командасына ауысты.

Ғалымжан Кенжебек соңғы бір жарым жыл ішінде Қазақстан құрамасының көшбасшы ойыншысына айналды, сонымен қатар еуропалық клубтардың назарын өзіне аудартты. БАҚ хабарлауынша, оны Шотландияның «Рейнджерс» және «Хартс» клубтары, сондай-ақ грекиялық «Олимпиакос» және венгриялық «Ференцварош» клубтары бақылап отыр.

Бұған дейін Карагунис «Қайрат» пен «Олимпиакос» арасындағы Чемпиондар лигасының матчы туралы пікірімен бөліскен болатын.