Самородов пен Черчесов арасында ешқандай мәселе жоқ: Максим «Динамоға» қарсы ойнауы мүмкін

БАҚ беттерінде тараған ақпараттарға қарамастан, ASnews.kz Максим Самородовтың «Ахматтың» бас бапкері Станислав Черчесовпен жақсы қарым-қатынаста екенін хабарлайды.

23 жастағы қазақстандық вингер РПЛ 16-турындағы «Рубинге» қарсы өткен ойынға (0:1) бапкермен болған жанжалдың кесірінен емес, суық тигізіп алғандықтан қатыспаған. Шабуылшы бүгін «Динамомен» (Мәскеу) болатын ойында шығады деп күтілуде.

Самородов Грозныйда өзін жайлы сезінеді:

«Мен сіздерге Черчесовпен болған жанжал туралы сыбыстардың шындыққа жанаспайтынын хабарлағым келеді. Олардың арасында ешқандай мәселе жоқ, Максим «Динамомен» болатын ойынға шығуды жоспарлап отыр», – деп растады инсайдер Адам Ахмадов.

Биылғы маусымда «Ақтөбе» түлегі Ресей Премьер-лигасында 15 рет алаңға шығып, «гол+пас» көрсеткіші бойынша алты ұпай жинады. Қазақстан құрамасының экс-бапкері жаттықтыратын «Ахмат» командасы қазіргі уақытта турнир кестесінде 12-ші орында тұр.