Джолчиев, Самородов және Сәтпаев. Георгий Жуков үздік қазақстандық футболшыларды атады

Қазақстан құрамасының жартылай қорғаушысы Георгий Жуков BorodAbata.kz сайтына берген сұхбатында қазақстандық футболшылардан ең мықты бесеуін атады.

«Бірінші нөмірде – Бауыржан Джолчиев. Ал қазіргі кезде Максим Самородов пен Дастан Сәтпаевтың мықты екенін көріп отырмын. Дастанның әлеуеті зор. Төртінші орында Нөсербаев, одан кейін Зайнутдинов. Бақтиердың ойынын жарақаттар бәсеңдетіп тастады. Дені сау болған кезде ол үздік ойыншы. Ол кез-келген позицияда ойнай береді. Бақтиер – нағыз жауынгер, физикалық жағынан да, ойлану тұрғысынан да өте мықты. Техникасы да жаман емес. Басымен де, екі аяғымен де гол соғады, стандартты да, пенальтиді де жақсы орындайды және маңызды сәттерде көмектеседі.

Наурыз айында өткен матч кезінде Самородов пен Сәтпаевтың ойынынан үлкен әсер алдым. Сәтпаев осы қарқында дами берсе, өте жоғары деңгейде ойнайды деп ойлаймын. Самородов қазірдің өзінде дайын футболшы: епті, жылдам, доп оған «жабысып» тұрады. Макс физикалық тұрғыдан күшті және үнемі жоғары жылдамдықта спринт жасай алады. Қазір ол «Ахматтың» құрамында гол соғып, ассист жасап жүр. Бұл алға қарай ілгерілеудің маңызды қадамдары», - деді Жуков.

2025 жылдан бері Георгий Жуков польшалық «Пуща» сапында ойнап жүр.