Ван Дейк – Бельгиямен болған тең ойын жайлы: Қазақстан бұл нәтижемен мақтана алады

Бельгиялық футбол агенті Кен Ван Дейк ASnews.kz сайтына берген сұхбатында Қазақстан құрамасымен болған тең ойын (1:1) жайлы пікірімен бөлісті.

«Қазақстан Бельгияға қарсы тамаша ойнады. Бұл Солтүстік Македонияға қарсы тең ойыннан кейінгі тағы бір керемет перфоманс болды, сондықтан жігіттер бұл нәтижемен мақтана алады. Келесі маусымда Қазақстан одан да жақсы өнер көрсетеді деп үміттенемін.

Жергілікті БАҚ қақпашыларыңызды мақтап жатыр, ал Сәтпаев қазірдің өзінде әлемдік деңгейдегі ойыншы атанды. Оны таныстырудың да қажеті жоқ. Ойынын қызыға қарап жүрміз. Сондай-ақ Вороговский мен Оразовты атап өткім келеді, олардың болашағына қатысты шешімді алдағы апталарда білетін боласыздар», – деді Ван Дейк.

Бельгиялық маман өткен маусымда «Елімай» сапында жалда ойнаған Рамазан Оразов пен «Астанадағы» Ян Вороговскийдің агенті ретінде жұмыс істейді. 27 жастағы жартылай қорғаушы әлі күнге дейін Данияның «Силькеборг» командасына тиесілі.

Талғат Байсуфиновтың командасы ӘЧ-2026 іріктеу кезеңінің соңғы турында Бельгиямен тең ойнады. 17 жастағы Дастан Сәтпаев ұлттық құрамадағы дебюттік голын соқты.