Байсуфинов – Чесноковтың қызыл қағазы туралы: жігіттерді қорғау керек болды

Қазақстан құрамасының бас бапкерінің міндетін атқарушы Талғат Байсуфинов Бельгияға қарсы ойында Ислам Чесноковтың алаңнан қуылуы және өзінің сары қағаз алуы туралы пікір білдірді, деп хабарлайды ASnews.kz.

«Баяғыда жас жігіттер төбелесіп қалса, үлкендері қолдап жүретін еді ғой. Бұл жолы да сол – жігіттерді қорғадым. Чесноковқа көрсетілген қызыл қағазды әлі қарап шығу керек. Бүкіл Бельгия құрамасының бапкерлері Исламға лап қойғанда, қалай қарап тұра аламын? Оларға не айтқанымды есіме де түсіре алмаймын, бәрібір түсінген жоқ (күлді)», – деді Байсуфинов.

Маруаұлы сондай-ақ Қазақстан құрамасын толыққанды бапкер ретінде басқаруға дайын екенін мәлімдеді:

«ҚФФ басшыларымен – Давид Лория, Әли Әлиев – кезінде жолдарымыз түйіскен. Мен „Ертішке“ барған кезде, маған көмектескен. Енді мен де көмектесуге дайынмын. Әуелі Фарер аралдарымен ойнап алайық. Сосын басшылықпен кездесіп, сөйлесеміз».

Байсуфинов журналист Эльдар Аманбаевтың «Қазақстан Бельгиядан ұпай алса, шашымды алдырамын» деген сөзіне де тоқталды:

«Мен Кеңес армиясында қызмет еттім, аға сержант болдым. Әскерде шашымды көп алдырмайтынмын. Оның үстіне ұстараны дұрыс қолдана алмаймын. Эльдардың шашын құртып аламын ба деп қорқамын», – деп әзілдеді ол.

Қазақстан құрамасы ӘЧ-2026 іріктеу кезеңіндегі соңғы матчында Бельгиямен 1:1 есебімен тең түсті. Дастан Сәтпаев ұлттық құрамадағы алғашқы голын соқты.

Енді Талғат Байсуфинов шәкірттері 18 қараша күні Хорватияда Фарер аралдарымен жолдастық матч өткізеді.