«Шалькедегі» жас таланттың әкесі: Оның Қазақстан құрамасына шақыртылуына оң көзқараспен қараймыз

«Шалькенің» 16 жасар қорғаушысы Глеб Броцманның әкесі Гунар өз баласының Қазақстан жастар құрамасына шақыртылу мүмкіндігіне баға берді.

«Біз бұған тек оң көзқараспен қараймыз. Егер ұсыныс (ҚФФ-дан) түссе, қуанар едік, бірақ футбол құбылмалы спорт: бүгін «Шалькедеміз», бірақ ертең не боларын кім білсін? Барымызды саламыз. Ұлттық құраманың назар аударуы – біз үшін алға жасалған қадам. Достарымның 80 пайызы Қазақстанның тумасы, оның ішінде Виталий Карпов бар. Ол 2000 жылдары Көкшетауда ойнады.

Глебке жай ғана Қазақстанға барып, сол жердің жігіттерімен қабілеттерін салыстыру пайдалы болар еді. Мен Қазақстан футболы туралы көп естідім және оның өсіп келе жатқанын көріп жүрмін. Мысалы, «Зенитте» ойнайтын Нұралы Әліпті білемін, бұл көп нәрсені аңғартады. Ірі әрі мықты қорғаушы. Тіпті қатал әрі өзін тәкаппар санайтын (Андрей) Аршавин «Қайратқа» барып ойнады, демек бұл Қазақстанда бәрі керемет дегенді білдіреді», - деді Гунар Броцман BorodAbata.kz сайтына берген сұхбатында.

Өткен жылы Глеб Броцман «Шалькенің» академиясына қабылданған болатын. Оның анасы Алматыда туылған. Ал Глебтің інісі, 14 жастағы Хуго футболдағы алғашқы қадамдарын жасауда және қазір «Кобленц» сапында ойнап жүр.