Ербол Қайыров: Өзбекстан ӘЧ-2026-ға жолдама алып, өзіне қажетті «футбол базарына» шықты

Спорт журналисі әрі BorodAbata.kz жобасының авторы Ербол Қайыров Өзбекстан құрамасының 2026 жылғы әлем чемпионатына жолдама алғаны жайлы пікір білдірді. Оның айтуынша, бұл нәтиже – көпжылдық еңбектің жемісі әрі өзбек футболындағы даму кезеңінің бастауы.

– Иә, әрине, Өзбекстанда да Қазақстандағыдай проблемалары көп. Коррупция, балалар футболындағы мәселелер, шетелден келген әлсіз бапкерлер, инфрақұрылым деңгейі, балалар бапкерлерінің төмен жалақысы – бәрі де бар. Бірақ мемлекеттің көмегімен біртіндеп өзбек бауырларымыз осы проблемаларды шешіп жатыр. Боксты қалай көтерді! Әлем, Азия чемпионаттарында, Олимпиадаларда қаншама алтын медаль алды! Ал енді кезек футболшыларда! Осы нәтиже – өзбектердің тек бастамалары ғана, – дейді Ербол.

Оның айтуынша, әлем чемпионаты – тек бедел емес, сонымен қатар шетелдік скауттар үшін үлкен мүмкіндік:

– Клубтарға демеушілер келеді, Файзуллаев «Баварияға» барады, Урунов, Еркінов, Мозговой сияқтылар ертең Еуропаға кетеді. Кеше ғана Олимпиадада ойнағандар үлкен мүмкіндік алып, мансаптарын ары қарай дамытады. Шетелдік скауттар Өзбекстанға келіп, дарынды футболшыларды іздей бастайды. Әрине, талантты ойыншылары көп, сондықтан осы мундиаль көршілерге ауадай қажет болды. Себебі үлкен додалар – Әлем, Азия, Еуропа чемпионаттары клубтар үшін базар, демек, ярмарка сияқты. Өзбектер өздерін көрсетіп, кейін Еуропада ойнайтын өкілдер санын көбейтеді, – деп қорытындылады журналист.

Қайыровтың бұл пікірі Өзбекстан футболының жаңа кезеңге аяқ басқанының дәлелі ретінде қабылдануда.