Әли Әлиев – Қазақстанның УЕФА-да ойнауы туралы: Бұл жақтан көп ақша бөлінеді, Азияда олай емес

Әли Әлиев Солтүстік Македонияға қарсы матч алдындағы баспасөз мәслихатында Қазақстанның АФК-да емес, УЕФА-да ойнауы туралы пікір білдірді

– Сіз бұған дейінгі сұхбатыңызда УЕФА-да жүріп, Қазақстанға Мбаппе, Лукакуларды әкелдік деп айттыңыз. Еуропада жүріп, Франция, Бельгиялардан жеңілгенше, Азияда Түркменстан, Қырғызстанды жеңіп, әлем чемпионатына шыққан дұрыс емес пе?

– Сізбен толық келісемін. Әлем чемпионатына міндетті түрде шығу керек. УЕФА Қазақстан футболының дамуы үшін қыруар қаржы бөлуде. Ал АФК мұншалықты көп ақша бере алмайды. Мен ел футболына қаржыландырудың мол болғанын қалаймын. Ал Қазақстанда футболға басқа жақтан ақша тарту өте қиын. 

Клубтағы жағдай да солай. Еурокубокта ойнайтын клубтарымыз әр кезеңнен өткен сайын, ақша алып отырады. Мысалы, «Астана» топтық кезеңге шықса, әжептеуір пайдаға кенеледі. Ал Азияда олай емес. 

Біздің УЕФА-да немесе АФК-да ойнауымызды мен емес, басшылық қабылдайды. Мен тек өз қөзқарасымды білдірдім. Біздің жанкүйерлер Франция құрамасымен келген Килиан Мбаппені өз көздерімен көріп, стадионды толтырды. Бар болғаны осы.

Қазақстан мен Солтүстік Македония арасындағы әлем чемпионаты іріктеу кезеңінің үшінші тур ойыны ертең, 9 маусымда «Астана Аренада» өтеді.