«Оқжетпес» директоры: ҚПЛ-да кабинетте шешілетін мәселелер көп, бірақ бұған араласпаймын

«Оқжетпес» клубының бас директоры Ербол Қайыров қазақ футболында әлі де болса кабинетте шешілетін мәселелердің бар екенін мәлімдеді, деп хабарлайды ASnews.kz.

«Мен негізі «қара киімдегі» адамдармен сөйлеспеймін. Олардың бар екенін қазақ футболын жақсы түсінетін адамдар біледі. Біздің басты мақсатымыз – жасөспірімдер футболын көтеру, медиа-маркетинг саласын дамыту. Ребрендинг жасадық, стадионның ішін, сыртын қалыпқа келтірдік. Алдағы уақытта тағы бір реконструкция болады.

«Қара киімдегі» адамдармен сөйлесетін ниетім де жоқ. Мұндай істерге араласпаймын. Командаха рух берсем, сол жетеді. Бәрі алаңда шешілуі тиіс. Бірақ Қазақстан Премьер-лигасында кабинетте шешілетін мәселелер көп. Мұны журналист ретінде де талай рет айтқанмын. Бірнеше кландар бар. Ермұхамед Мәулен бұл сөзімді растап өтті. Қазір жиырма бірінші ғасыр. Қазақ футболын әділ жолмен көтеруіміз керек», – деді Қайыров «Футбол жолы» арнасындағы подкастта.

Қазақстан Премьер-лигасында 25 турдың қорытындысы бойынша «Ордабасы» 58 ұпаймен көш бастап келеді. «Қайраттың» олардан бір ұпайы кем. Ал «Оқжетпес» 42 ұпаймен төртінші орында тұр және еурокубок жолдамасына таласуда.

Бүгін ҚПЛ 27-туры аясында «Астана» өз алаңында «Қайратты» қабылдайды. Ал «Ордабасы» «Атыраумен» кездеседі.