Өзбекстандық із бе? Көрші елде «Ертіс»—«Оқжетпес» ойынының күмәнді сипаты туралы айта бастады

ASnews.kz бұған дейін хабарлағандай, Қазақстан футбол федерациясы (ҚФФ) премьер-лиганың 26-туры аясындағы павлодарлық «Ертіс» пен «Оқжетпес» арасындағы матчтың мән-жайын тексеруді бастады.

Еске сала кетейік, Павлодардағы кездесу алаң қожайындарының 2:1 есебімен сенсациялық жеңісімен аяқталды. Ойын нәтижесі командалардың турнирлік кестедегі жағдайына байланысты үлкен назар аудартты: «Ертіс» кестенің соңында тұрып, лигада қалу үшін жанталаса күресіп жатқан болса, «Оқжетпес» үшінші орын мен еурокубоктарға жолдама алудан үмітті еді.

Шетел назары

Енді бұл матч төңірегіндегі дау Қазақстаннан тыс жерлерге де жетті. Өзбекстандық танымал Championat.Asia спорт басылымы да ҚФФ тергеуінің барысына назар аударды.

Оқиғалар хронологиясын және матчтың жоғарыда аталған барлық күмәнді тұстарын (соққылардың болмауы, бапкердің байланыстары және құраманың екі экс-ойыншысын тексеру) баяндай келе, портал өз аудиториясы үшін маңызды фактіге басымдық берді. Басылым оқырмандарына тергеу орталығында қалған көкшетаулық «Оқжетпес» құрамында қазіргі таңда өзбекстандық екі легионер өнер көрсететінін жеке еске салды.

Біз бұған дейін жазған күдікке себеп болған негізгі жайттарды еске сала кетейік:

ҚФФ тергеуіне аномальді статистика (бірінші таймда аутсайдердің 13 соққысына қарсы фаворитте 0 соққы), гол авторларының түсініксіз алмастырылуы, күдікті букмекерлік котировкалар және матч алдындағы сөз байласу туралы қауесеттер себеп болды. «Оқжетпес» тәлімгері Ринат Алюетов пен оның бірқатар футболшыларының павлодарлық клубпен тығыз байланысы жағдайды одан сайын ушықтыра түсуде. Қазіргі уақытта ресми қорытындысы әлі күтіліп отырған істе Қазақстан ұлттық құрамасының бұрынғы екі ойыншысы – У.А. және Р.А. фигурант ретінде аталып отыр.