«Жеңетінімізге күмәндандым»: «Ордабасының» иесі – «Оқжетпеске» қарсы ойын туралы

Шымкенттік «Ордабасының» ортақ иесі Бейбіт Әлібеков Қазақстан премьер-лигасының 25-туры аясында «Оқжетпестен» жеңілгеніне қатысты пікір білдірді, деп хабарлайды ASnews.kz.

«Көкшетаудағы осы футбол мерекесіне атсалысқан барша қауымға алғыс айтқым келеді. Өте тамаша болды, олардың бұл іске қалай кіріскені маған қатты ұнады. Көкшетау өте кішкентай қала сияқты көрінуі мүмкін. Бірақ бәрі сондай әдемі әрі керемет өтті. Бұрын пікірлерде үнемі «мына қорқынышты үйді жабыңдаршы» деп жазатынмын. Олар менің жазғанымның бәрін артығымен орындапты. Стадионда сондай сұлулық орнатыпты... «Оқжетпестің» көп ақша жұмсағаны соншалық, мен тіпті «біз шынымен де жеңе аламыз ба өзі?» деп күмәнданып қалдым. Көкшетаулықтар жеңілмеуі тиіс еді, «Оқжетпес» барын салып, жанкештілік танытты. Мысалы, «Елімаймен» өткен матчтағы әсер мүлдем басқаша болған», – деді Әлібеков.

Көкшетаудағы матчта «Оқжетпес» 2:1 есебімен жеңіске жетті. Қонақтар Бьорн Йонсеннің арқасында алға шыққанымен, алаң иелері пенальтиден (Нұрғайни Бөрібаев) таразы басын теңестіріп, Леонарду Де Ассунсаудың дәл соққысымен үш ұпайды жұлып әкетті.

Чемпионаттың аяқталуына алты тур қалғанда «Ордабасы» (55 ұпай) көшбасшы «Қайраттан» екі ұпайға қалып, екінші орында келеді. Сонымен қатар, алматылықтардың күнтізбе бойынша басымдығы бар: қалған алты матчтың төртеуін олар өз алаңында өткізсе, шымкенттіктер тек екі рет қана өз жерінде ойнайды.

Бүгін, 12 қыркүйекте «Ордабасы» 26-тур аясында Шымкентте елордалық «Астананы» қабылдайды. Ертең, 13 қыркүйекте «Қайрат» өз алаңында қостанайлық «Тобылмен» кездессе, «Оқжетпес» сырт алаңда павлодарлық «Ертіске» қарсы ойнайды.

«Ордабасы»—«Астана»: ҚПЛ ойынына болжам мен бәс тігу