«Ордабасы» Шымкенттегі екі балалар үйіне теледидар сыйлады

«Ордабасы» футбол клубы Шымкентте қайырымдылық шарасын өткізіп, жергілікті екі балалар үйінің тәрбиеленушілеріне жаңа техника сыйға тартты, деп хабарлайды ASnews.kz.

Балалар шымкенттіктердің өз алаңындағы матчтарына үнемі келіп, команданы стадион трибунасынан қолдап жүреді. Енді жаңа теледидарлардың арқасында жас жанкүйерлер сүйікті клубының сырт алаңдағы ойындарын да тамашалай алады.

Бұл бастама әлеуметтік мекеме тәрбиеленушілерінің қаланың футбол өмірінен тыс қалмай, команданың чемпионаттағы маңызды бәсекелерін жібермей қарауына бағытталған.

Қазіргі уақытта «Ордабасы» 23 матчта 55 ұпай жинап, Қазақстан чемпионатының турнирлік кестесінде сенімді түрде көш бастап тұр. Шымкенттік клуб екінші орында келе жатқан алматылық «Қайраттан» жеті ұпайға алда келеді (алматылықтардың қорында екі ойын бар).

«Салқынқанды ойнауға тырыстым»: Давиад Абагна «Қызылжарға» соққан голы туралы айтты