«Ірі жеңістің құпиясы – жылдам голда»: Мендонса «Қайраттың» «Ертісті» жеңгені туралы

Алматылық «Қайраттың» жартылай қорғаушысы Гуштаву Мендонса ASnews.kz тілшісіне берген сұхбатында ҚПЛ-дің 23-турында «Ертісті» өз алаңында ірі есеппен (5:0) жеңген ойынға қатысты пікір білдіріп, Конференция лигасының алдағы матчынан не күтетінімен бөлісті.

«Біз әр матчта дерлік бірдей ойын көрсетеміз, біздің менталитетіміз өзгермейді. Бірақ бүгін біздің күш-жігеріміз жемісін берді: көптеген қауіпті сәттер тудырып, ерте гол соқтық. Бұл голдар соғуды жалғастыру үшін өте маңызды. Осы ірі жеңістің құпиясы да дәл осы жылдам голда жатыр деп ойлаймын», – деп атап өтті Мендонса.

Сондай-ақ футболшы алматылық клубтың тығыз күнтізбесі мен грекиялық грандқа қарсы еурокубоктық текетіреске дайындығы туралы айтты:

«Әр 3-4 күн сайын ойнау әрдайым оңай емес. Біз аз жаттығамыз, өйткені қазіргі уақытта ең бастысы – келесі матчтарға қалпымызға келу. Бірақ бүгін бұның еш маңызы жоқ екенін көрсеттік: біз өз футболымызды ойнап, көп гол соғып, жеңіске жете аламыз.

«Панатинаикоспен» өтетін матч өте қиын болады. Біз олардың мықты тұстарын және не нәрсеге қабілетті екенін білеміз. Дегенмен өз ойынымызды көрсетіп, табанды еңбек етіп, жеңіске жетуге тырысамыз, өйткені бұл – өз алаңымыздағы матч. Конференция лигасындағы мақсаттарға келетін болсақ, біз ойыннан ойынға қадам басуды жоспарлап отырмыз. Біздің міндетіміз – келесі матчқа назар аудару, онда жеңіске жетуге тырысу және қолдан келгеннің бәрін жасау».

Айта кетейік, 22 қазанда алматылық «Қайрат» Орталық стадионда Конференция лигасының жалпы кезеңінің екінші туры аясында грекиялық «Панатинаикосты» қабылдайды. Еурокубоктың бірінші турында қазақстандық команда сырт алаңда латвиялық «Ригамен» тең түскен болатын (1:1).

«Желтоқсанда қайда шығатынымызды көреміз»: «Қайрат» капитаны «Ертісті» ұтуы және еурокубоктар туралы