«Қызылжарға» «Алтаймен» өткен матч үшін техникалық жеңіліс қаупі төніп тұр: команда ҚПЛ регламентін бұзды

Петропавлдық «Қызылжар» Қазақстан премьер-лигасының 21-туры аясында өскемендік «Алтайға» қарсы кездесуде техникалық жеңіліс алатыны анық. Бұған қонақтардың бапкерлер штабы мен әкімшілігі тарапынан регламенттің дөрекі бұзылуы себеп болды, деп хабарлайды ASnews.kz.

21-турдағы кездесу 2:2 есебімен тең аяқталды. Бірінші таймда «Қызылжардың» фарерлік шабуылшысы Йоханнес Бьерталид айып соққысын дәл орындап, қонақтарды алға шығарды. Екінші таймда өскемендіктер Ибрагим Дадаев пен Никола Джамбордың голдарының арқасында ойын бұрылысын жасады, бірақ екінші таймға қосылған үшінші минутта петропавлдықтардың ивуарлық шабуылшысы Этьен Бегр есепті теңестіріп, командасын жеңілістен аман алып қалды.

Таблода тіркелген нәтижеге қарамастан, «Қызылжарға» техникалық жеңіліс (0:3) есептеледі. Петропавлдықтар бастапқы құрамда украиналық жартылай қорғаушы Александр Нойокты алаңға шығарған.

Ереже бұзуға көктемде орын алған күнтізбелік өзгеріс себеп болды:

• 2026 жылдың 17 мамырында «Ақтөбе»—«Атырау» (1:1) матчы өтті. Бастапқыда командалар 10-тур аясында ойнауы керек еді, бірақ клубтар мен ҚФФ келісімі бойынша турларды ауыстырды. Нәтижесінде Ақтөбедегі мамырдағы ойын ресми түрде 21-тур есебіне жазылды.

• Ол кездесуде «Атырау» сапында ақтөбеліктерге қарсы украиналық жартылай қорғаушы Александр Нойок өнер көрсетті.

• 2026 жылдың шілдесінде Нойок «Атыраудан» петропавлдық «Қызылжарға» ауысты.

• «Қызылжардың» бапкерлер штабы Нойокты чемпионаттың 21-туры аясындағы «Алтайға» қарсы матчтың бастапқы құрамына енгізді.

Футболдан ҚР Чемпионатының ресми Регламенті мұндай эпизодтарды қатаң реттейді:

• 6.57-тармақ: «Бір ойын туры аясында бір ойыншының әртүрлі клубтар сапында қатысуына тыйым салынады».

• 6.17-тармақ: «Белгіленген тәртіпке сәйкес ресімделмеген немесе дисквалификацияланған футболшының ҚРЧ матчына қатысуы жағдайында матчтың нәтижесі күшін жояды, ал тиісті футболшы қатысқан командаға ҚФФ-ның Тәртіптік регламентіне сәйкес санкциялар қолданылады».

Осылайша, ҚФФ-ның бақылау, тәртіп және әдеп комитеті жақын арада ресми түрде кездесу нәтижесінің күшін жойып, «Алтайға» 3:0 есебімен техникалық жеңіс береді.