«Астана» легионері Башич ӘЧ-дағы тәжірибесі туралы: топ-стадиондардан кейін ҚПЛ-ға оралу қиын емес

«Астананың» босниялық жартылай қорғаушысы Иван Башич ASnews.kz тілшісіне берген сұхбатында «Ақтөбені» жеңген (3:2) ойын мен әлем чемпионатына қатысқаны туралы айтып берді.

– Құрамды сәл өзгерттік: Конференция лигасында «Динамо Ситиге» қарсы ойнаған жігіттер демалды. Дегенмен, әсіресе доппен жақсы ойнадық. Алғашқы 30–35 минутта тіпті мінсіз өнер көрсеттік. Содан кейін сәл босаңсып қалдық. Қарсыласта 2-3 қауіпті стандарт болды. Екінші таймда да жақсы ойнап, матчта жеңіске жеттік.

– Бапкер үзілісте не айтты?

– Осылай ойнауды жалғастыру керек деді. Әр ойыншы өз мүмкіндігін соңына дейін жеткізуін сұрады.

– Жақында ғана әлем чемпионатынан оралдыңыз. Мундиалдағы атмосфера мен өз ойыныңызды қалай бағалайсыз?

– Атмосфера өте керемет, тарихи болды. Біз жеңіске жетіп, топтан шықтық. Ал өз ойыныма көңілім толады.

– Әлем чемпионатының үлкен стадиондарынан кейін біздің шағын стадиондарға психологиялық тұрғыдан ауысу қиын емес пе?

– Жоқ. Мен кәсіпқой ойыншымын. Әр ойынға бірдей дайындалып, бірдей жауапкершілікпен қарауым керек. Сондай-ақ командаға көмектесіп, жарақат алмауым қажет. Сондықтан ешқандай айырмашылық жоқ.

Еске сала кетейік, «Астана» мен «Ақтөбе» арасындағы тартысты кездесу алаң иелерінің ерік-жігер көрсеткен жеңісімен аяқталды. «Астана» ойыншысы Дмитрий Шомконың соққан голына қонақтар үзіліс алдында жауап беріп, Гиорги Зария мергендік танытты. Кейін Артур Шушеначев «Ақтөбені» алға шығарды. Алайда көп ұзамай Иван Башич таразы басын теңестіре алды, ал ойын соңында Станислав Басманов елордалық командаға жеңіс сыйлаған шешуші голды соқты.

Башич өнер көрсететін Босния және Герцеговина құрамасы 2026 жылғы Әлем чемпионатындағы жорығын 1/16 финалда аяқтап, АҚШ құрамасына 0:2 есебімен жол берді. Команда В тобында төрт ұпай жинап, үшінші орынмен плей-офф кезеңіне жолдама алған болатын.