Ресейлік клуб «Ордабасы» түлегі үшін үш миллион еуро ұсынды

Ресейлік «Балтика» ағымдағы трансферлік терезеде шымкенттік «Ордабасының» 19 жастағы шабуылшысы Жасұлан Әмірді сатып алу бойынша ұсыныс жасады, деп хабарлайды ASnews.kz.

Белгілі болғандай, РПЛ клубы шымкенттіктердің түлегі үшін үш миллион еуро төлеуге дайын болған. Алайда қазақстандық клубтың басшылығы бұл ұсыныстан бас тартты – «Ордабасының» қожайындары маусым ортасында негізгі ойыншысын жібергісі келмейді. Бұдан бөлек, шабуылшының өкілдері үшін тұрақты ойын практикасы маңызды: футболшының тарапы жаңа клубта оның алаңға үнемі шығып тұруына кепілдік беруді талап етіп отыр.

Осы маусымда Әмір «Ордабасы» сапында барлық турнирде 19 матчқа қатысып, сегіз гол соқты және бес нәтижелі пас берді.

Ағымдағы жылдың маусым айында жас форвард Арменияға қарсы жолдастық кездесуде (1:1) Қазақстан ұлттық құрамасы сапында алғашқы ойынын өткізіп, нәтижелі паспен көзге түсті.

Қазіргі уақытта Transfermarkt порталы футболшының трансферлік құнын 500 мың еуроға бағалап отыр.