«Ұлытаудың» жапондық ойыншысы: «Ордабасыдан» гол жіберіп алған кез – менің қателігім

Жезқазғандық «Ұлытаудың» жапондық жартылай қорғаушысы Котаро Киши ҚПЛ-дың 16-турындағы «Ордабасыға» қарсы ойыннан кейін (0:1) ASnews.kz тілшісіне берген сұхбатында жіберілген гол, Қазақстан чемпионатының деңгейі және басқа жапондық легионерлермен байланысы туралы айтты.

– Котаро, «Ордабасыға» қарсы өткен қиын матч туралы не айтасыз?

– Бұл тамаша ойын болды, өйткені «Ордабасы» – жарыс кестесінің көшбасшысы. Біз бірінші таймды жақсы өткіздік. Екінші таймда да барымызды салып бақтық, бірақ бір сәтте бақылауды жоғалтып алдық. Қарсылас гол соққан сәтте менің қателігім кетті. Дегенмен біз жақсы ойнадық, тек алға жылжуды жалғастыруымыз керек.

– Қазақстан премьер-лигасы туралы қандай пікірдесіз?

– ҚПЛ-да бәрі жоғары деңгейде: медиа да, әр стадион да өте жақсы. Жылдамдық, физикалық дайындық және техника – бәрі дұрыс жолға қойылған. Қазір бұл лига өсіп келеді. Ал Шымкенттегі атмосфера – премьер-лигадағы ең үздіктердің бірі. Алайда, егер Жапония лигасымен салыстыратын болсақ, деңгейді бұдан да өсіру үшін ойын қарқындылығын арттыру керек деп ойлаймын. Жапонияда допты жоғалтқан кезде оны кейін қайтарып алу қозғалысы өте жылдам жасалады.

– Қазір ҚПЛ-да сізді қосқанда үш жапондық футболшы өнер көрсетеді. «Ертістегі» Юши Шимамурамен байланысып тұрасыз ба?

– Иә, иә, кейде сөйлесіп тұрамыз. Әсіресе алғашқы уақытта бір-біріміздің бейімделуімізге көмектестік. Бір-бірімізге қолдау көрсету біз үшін өте маңызды. Оған сәттілік тілеймін.

– Осы маусымда «Ұлытау» сапында өте жақсы ойын көрсетіп жүрсіздер...

– Бізде командалық байланыс өте жақсы жолға қойылған. Құрамымызда топ-деңгейдегі жұлдызды ойыншылар болмаса да, өзара түсіністік пен байланыс жағынан өте мықтымыз. Бір-бірімізге барынша қолдау көрсетеміз. Осындай нәтиже көрсетіп жатқанымыз да соның арқасы.

Осы матчта екінші таймда жіберілген жалғыз голдың салдарынан жеңіліске ұшыраған жезқазғандық «Ұлытау» 23 ұпаймен ҚПЛ турнирлік кестесінің орта тұсында (8-орында) қалды. Ал «Ұлытауды» тізе бүктірген шымкенттік «Ордабасы» 40 ұпай жинап, алматылық «Қайратты» басып озды және премьер-лигадағы көшбасшылығын қайта қайтарды. Мұнымен қоса, шымкенттіктердің қорында әлі екі матч бар.