«Қайсар» албаниялық клубқа ақша төлеуден бас тартты: істің мән-жайы

«Поградеци» клубы мен Албания футбол федерациясы «Қайсардан» нигериялық шабуылшы Имо Эзекильді тіркеу мәселесін жедел шешу үшін 10 мың доллар талап еткен, деп хабарлайды ASnews.kz.

ҚПЛ-дың екінші турында «Астанаға» қарсы матч алдында «қасқырлар» Эзекильдің бұрынғы клубынан берілетін босату құжатының жоқ екенін білген. Бұл құжатсыз футболшының ойынға қатысуы мүмкін емес еді.

«Қайсар» сұралған соманы азайтуға тырысқанымен, албаниялықтар бұған келіспеген.

Соның салдарынан 32 жастағы шабуылшы «Астанаға» қарсы кездесуді өткізіп алды. Ойын 0:0 есебімен тең аяқталды.

Transfermarkt дерегіне сәйкес, Эзекильдің албан клубымен келісімшарты осы жылдың қаңтар айының соңында аяқталған.

Ол бұған дейін Непалдың «Лалитпур» және Румынияның УТА клубтарында ойнаған. Кәсіби мансабын Бельгияның «Стандард» клубында бастап, онда АПЛ чемпионы Миши Батшуайимен бірге өнер көрсеткен.

«Қайсар» сондай-ақ Виктор Мозесті де қатарға қосты. «Астанаға» қарсы дебюттік ойында 35 жастағы әмбебап ойыншы 26 минут ойнап, нәтижелі әрекетпен көзге түсе алмады.