Бекхан Шайзада: қыста ұсыныстар болды, бірақ «Ордабасыда» қалғым келді

«Ордабасы» мен Қазақстан құрамасының қақпашысы Бекхан Шайзада ASnews.kz сайтына берген сұхбатында елордалық «Жеңіс» клубы және ҚПЛ-дың басқа да командалары тарапынан өзіне қызығушылық болғанын айтты.

«Маусым аяқталғаннан кейін маған Қазақстандағы бірнеше клубтан ұсыныс түсе бастады. Иә, «Жеңіс» клубымен де сөйлестік. Бірақ мен үшін ең бастысы – туған командам «Ордабасыда» қалу еді. Келіссөз барысында өз мақсаттарымды айттым, соған сай клуб маған командада қалу жөнінде ұсыныс жасады. Шымкент – менің туған үйім. «Ордабасыда» бүкіл кәсіби мансабымды өткізіп келемін: осыдан он жыл бұрын негізгі команда сапында алғаш рет алаңға шыққанмын. Алдағы уақытта да клуб жанкүйерлерін қуантуды және команданың үлкен мақсаттарына жетуіне көмектесуді қалаймын», – деді Шайзада.

Қысқы трансферлік кезеңде «Ордабасы» клубынан молдовалық қақпашы Дмитрий Челядник кетіп, «Қызылжар» командасына ауысқан болатын.