«Ақтөбе» футболшылары Астанада тұрып, ойын кезінде Түркістанға барады

Алдағы күндері «Ақтөбе» клубының футболшылары, бапкерлік штабы мен қызметкерлері Түркияның Анталия қаласынан Қазақстан астанасына келеді, деп хабарлайды ASnews.kz.

Команда уақытша осы қалада орналасады, ал маусым басында өз алаңындағы матчтарын Түркістанда өткізеді. Бұған дейін Қазақстан футбол федерациясы «ақ-қызылдарға» Ақтөбедегі қосалқы стадионда ойнауға рұқсат берген болатын, бірақ клуб басшылығы ойындарын «Түркістан Аренада» өткізу туралы шешім қабылдады. Ал бастапқыда клуб уақытша Шымкент қаласында орналасады деп күтілген еді.

Қазіргі уақытта «Ақтөбе» Түркияда жаңа маусымға дайындалып, бақылау матчтарын өткізуде. Клуб жаңа маусым басталғанға дейін бір-екі трансфер жасауы мүмкін.