DAZN тілшісі – Мозестің «Қайсарға» ауысуы жайлы: ол жақта ақша тауып, командасына көмектеседі

Италиялық DAZN телеарнасының комментаторы әрі журналисі Джованни Марруччи ASnews.kz сайтына берген сұхбатында Виктор Мозестің Қазақстанға келуі туралы пікір білдірді.

Нигериялық футболшының А Сериясындағы ойынымен жақсы таныс сарапшы бұл трансферден екі тарап та пайда көреді деп есептейді.

«Қайсардағы» жағдайдың қалай екенін білмеймін, бірақ команданың құрамы негізінен қазақстандық ойыншылардан құралғанын көріп отырмын. Сондықтан бұл жерде екі фактор да рөл ойнайды деп ойлаймын.

Бір жағынан, Мозес өзіне бейтаныс лигада және жаңа ортада ерекше тәжірибе жинап, 35 жасында келісімшартқа ие болып отыр. Ал екінші жағынан, осындай деңгейдегі шебер футболшы әдеттегідей әріптестерінің деңгейін көтеруге көмектеседі. Ең алдымен – өзінің мол тәжірибесінің арқасында», – деді Марруччи.

2019/20 жылғы маусымда Виктор Мозес Антонио Конте баптайтын Миланның «Интер» клубында ойнады. «Нерадзуррилер» сапында 20 матч өткізген ол бес нәтижелі пас беріп, командасымен бірге Еуропа лигасының финалына дейін жетті.

«Қайсар» клубы Мозеспен «1+1» жүйесі бойынша келісімшартқа отырды. Атақты вингердің трансферлік құны 300 мың еуроға бағаланып отыр.