ҚПЛ-дың экс-легионері – Анарбековтың Еуропаға кетуі жайлы: негізгі қақпашы болатын клубқа баруы тиіс

«Жеңіс» клубының бұрынғы қорғаушысы Матия Ром ASnews.kz сайтына берген сұхбатында «Қайрат» қақпашысы Темірлан Анарбековтың прогрессіне баға беріп, оның шетелдегі болашағына қатысты пікір білдірді.

Анарбековпен бір командада ойнаған словениялық футболшы қақпашының прогрессін ерекше атап өтті:

«Ғалымжан Кенжебек секілді, Анарбеков те «Жеңістегі» кезінен бері үлкен прогресс жасады. Темірлан сол кезде-ақ әлеуетінің мықты екенін көрсеткен. Ол өте шапшаң қимылдайды, сол аяғы да өте мықты.

Кейін «Қайратта» одан әрі дамып, қазір Қазақстандағы ең үздік қақпашылардың біріне айналды», – деді Ром.

Анарбековтың еуропалық чемпионатқа ауысу мүмкіндігі туралы айта келе, Ром жас қақпашыны асығыс шешім қабылдамауға шақырды:

«Болашақта оны Еуропаның бір лигасынан көреміз деп сенемін, бірақ клуб таңдауда өте мұқият болуы керек.

Қақпашы – өте ерекше позиция. Ол дамуын жалғастыру үшін бірден негізгі қақпашы бола алатын командаға ауысуы тиіс», – деп түйіндеді Ром.

22 жастағы Анарбеков 2024 жылғы маусымда елордалық «Жеңіс» клубында өткізіп, сол кезде Словения жастар құрамасының бұрынғы қорғаушысы Матия Роммен бірге өнер көрсетті.

Кейін қақпашы алматылық «Қайратқа» оралып, маусымды екінші нөмірлі қақпашы ретінде бастады. Алайда Чемпиондар лигасының іріктеу кезеңінде Александр Заруцкий жарақат алғаннан кейін негізгі құрамдағы орынды иеленді. «Селтикке» қарсы шешуші ойында Анарбеков матчтан кейінгі пенальти сериясында үш соққыны қайтарып, клубты турнирдің негізгі кезеңіне алып шықты.

Күзде қақпашы «Ақтөбеге» қарсы ойында жақ сүйегін сындырып алып, соның салдарынан «Спортинг» пен «Реалға» қарсы матчтарды өткізіп алды. Қайта қатарға қосылған соң, Чемпиондар лигасында «Пафос», «Интер» және «Копенгагенге» қарсы кездесулерде ойнап, «Олимпиакоспен» өткен матчта кездесудің үздік ойыншысы атанды.

Бұған дейін Ром бұрынғы командаласы Ғалымжан Кенжебектің «Ахматқа» ауысуына қатысты пікір білдірген болатын.