Өзбекстан мен Тәжікстанда үздік бапкер атанған маман ат басын Қазақстанға бұрады

Тәжікстандық бапкер Виталий Левченко павлодарлық «Ертіс» клубында кеңесші қызметіне тағайындалады, деп хабарлайды ASnews.kz.

53 жастағы маман негізгі команданың жұмысы мен Павлодардағы академияны дамыту мәселелеріне жауап береді. Сондай-ақ ол аймақта футболды дамыту бағыты бойынша Павлодар облысының әкіміне бейресми түрде кеңесші болады.

Бұған дейін «Ертістің» жаңа бас бапкері Самат Смақовтың көмекшісі ретінде беларусьтік маман Александр Седнев қарастырылған еді, алайда ол «Динамо Брестте» қалатын болды

Левченко қаңтар айында нақты шешім қабылдайды деп күтілуде.

Желтоқсан айының басында бапкер Өзбекстан Суперлигасының чемпионы атанған «Нефтчи» клубынан кетті. Сондай-ақ ол Тәжікстан чемпионатында «Истиклол» командасын екі рет чемпион қылды. Левченко екі мәрте Тәжікстанның үздік бапкері, сондай-ақ екі рет Өзбекстан Суперлигасының ең үздік жаттықтырушысы деп танылған. Тәжікстан құрамасы сапында тоғыз матч өткізген.