«Астанаға» қаражат бөлінетін болды: клубтың бір миллиардтай қарызы бар

«Астана» футбол клубы 2026 жылғы маусымға Sport Qory спортты қолдау қорынан шамамен 3 миллиард теңге алады, деп хабарлайды ASnews.kz.

Бұл қаржының бір бөлігі футболшылар, бапкерлер мен клуб қызметкерлері алдындағы қарыздарды өтеуге жұмсалады. Бірнеше айлық жалақы, сондай-ақ 2024 және 2025 жылдағы сыйақылар төленбегендіктен, қарыз көлемі 1 миллиард теңгеден асып отыр.

Қаржылық қиындықтарға байланысты клуб жартылай қорғаушы Макс Эбонгты Софияның ЦСКА клубына сатуға мәжбүр болды. Сонымен қатар жалақы қорын қысқарту мақсатында бірқатар ойыншылармен қоштасты.

Алдағы уақытта «Астана» ірі инвестордың қолдауына ие болады деп күтілуде. Алайда клубты жеке меншікке өткізу үшін барлық қарыздар толық жабылуы тиіс.

Өткен жылдың желтоқсан айында «Астана» елордада оқу-жаттығу жиындарын өткізуі тиіс болған. Дегенмен ақпан айында команда жаңа маусымға дайындықтың соңғы кезеңі аясында Біріккен Араб Әмірліктеріне аттанады.