«Қызылжарда» дау-жанжал туындауы мүмкін: Чурчичке селекция жұмыстары ұнамайды

«Қызылжар» клубының жаңа басшылығы команда құрамын бас бапкер Милич Чурчичтің қатысуынсыз жасақтап жатыр, деп хабарлайды ASnews.kz.

Жыл соңында келісімшартын ұзартқан сербиялық маман команданы күшейте алатын футболшылардың тізімін дайындаған болатын. Олардың қатарында «Тобылда» бірге жұмыс істеген таныс ойыншылар – Ахмед Эль-Мессауди, Игор Иванович, Радослав Цонев, Иван Миладинович және басқалар бар. Сонымен қатар көшбасшылардың бірі Самат Жарынбетовтың клубтан кетуі бапкерлер штабы үшін күтпеген жағдай болды.

Тәжірибелі қақпашы Мирослав Лобанцев те команада кетеді деп күтілуде, ол қазір өзге командалармен келіссөз жүргізіп жатыр. Ал команданың капитаны Александр Нойок бас менеджер Әлішер Апсалямовпен жұмыс істеуден бас тартып, «Атырау» клубына қайта оралу туралы шешім қабылдады.

Олардың орнына Апсалямов жас ойыншыларға сенім артуды жөн көрді. Жаңадан келген футболшылардың қатарында Әлихан Серікбай, Никита Губарев, Тимур Курбанов және өзге де жастар бар. Бас менеджер футболшыларды өзіне тиесілі футбол агенттігі арқылы келісімшартқа отырғызуда.

Ал «Қызылжардың» алдағы маусымдағы мақсаттарына келсек, петропавлдық клуб әлі нақты міндет қойған жоқ. Бұған дейін Милич Чурчич жоғары нәтижелерге қол жеткізе алатын бәсекеге қабілетті команда құруды жоспарлаған еді.

Сондай-ақ клубты меценат Сергей Канның өз иелігіне алғанын айта кетейік.