Словакия құрамасының экс-футболшысы – ҚПЛ-ға оралу жайында: кез-келген ұсынысты қарастырамын

«Тұран» клубының және Словакия құрамасының бұрынғы қорғаушысы Бранислав Слука ASnews.kz сайтына берген сұхбатында Қазақстанға қайта оралуға дайын екенін және «Жетісумен» болған келіссөздер жайлы айтты.

«Пухов» клубымен келісімшартым 31 желтоқсанда аяқталды, қазір еркін агентпін. Егер Қазақстанға қайта оралу мүмкіндігі туса – қарсы емеспін. Премьер-лигада ойнағым келеді және кез-келген ұсынысты қарастырамын. Мен тек бір агентпен сөйлестім. «Тұраннан» кеткеннен кейін «Жетісу» тарапынан қызығушылық болды, алайда нақты ұсыныс түскен жоқ», – деді футболшы.

2024 жылғы маусымда Слука түркістандық «Тұран» сапында 13 матч өткізіп, бір гол соқты.

26 жастағы сол қаптал қорғаушысы мансабының басым бөлігін өз еліндегі «Жилина» клубында өткізді. Бұл команда құрамында 106 ойынға қатысты. Сонымен қатар Слука чехиялық «Динамо» (Ческе-Будеёвице), венгриялық МТК және словакиялық «ВиОн» клубтарында да өнер көрсеткен.