Бауыржан Исламхан «Ордабасыдан» кету себебін түсіндірді

Қазақстан құрамасының экс-капитаны Бауыржан Исламхан ASnews.kz сайтына берген сұхбатында шымкенттік «Ордабасы» клубынан не себепті кеткенін айтты.

«2024 жылғы маусым аяқталған соң, жарақат алмай тұрып-ақ, клуб басшылығымен келіссөз жүргіздік. Қалуыма болар еді, бірақ бәрібір сөйлесіп алу керек еді. Сол кезде жол апатына түсіп, аяғымды сындырып алдым. Ол уақытта бірнеше нұсқа болғанымен, тек сөйлесіп, нақты шешім қабылдаған жоқ едім», – деді футболшы.

Сонымен қатар жартылай қорғаушы «Ордабасыға» алғысын білдіріп, клубтың оның мансабын қайта жандандыруға мүмкіндік бергенін атап өтті:

«Мен Қазақстан чемпионы атанған алғашқы клуб – «Ордабасы». Ол маусым өте керемет болды. Екі жылдық дисквалификациядан кейін алғашқы ойында айып добынан гол соққан сәт ұмытылмас әсер сыйлады. Футболды қатты сағындым. Маған қайтадан өзімді көрсетуге мүмкіндік бергені үшін «Ордабасыға» үлкен алғыс айтамын. Оның үстіне, 2023 жылы клубпен бірге тарихта алғаш рет чемпион атандық», – деп түйіндеді Исламхан.

Бауыржан Исламхан «Ордабасы» сапына 2023 жылдың басында, допингке байланысты екі жылдық дисквалификациясын өтеп болғаннан кейін қосылды. Сол маусымда ол командаға алғаш рет Қазақстан чемпионы атануға көмектесті.

Ал 2024 жылдың желтоқсан айында футболшы жол-көлік оқиғасы салдарынан жарақат алып, өткен маусымда бірде-бір ойынға қатыса алмады.