Forbes тізіміндегі олигарх ҚПЛ-дағы тағы бір топ-командадан бас тартты

Қазақстандық кәсіпкер Андрей Лаврентьев «Тобыл» футбол клубының иесі атануы мүмкін еді, деп хабарлайды ASnews.kz. Алайда қостанайлық клубты сату жөніндегі келісім жүзеге аспады.

Андрей Лаврентьев Қостанай қаласында орналасқан «Аллюр» компаниялар тобындағы директорлар кеңесінің төрағасы, «СарыарқаАвтоПром» ЖШС-нің басшысы әрі «Агромашхолдинг KZ» АҚ директорлар кеңесінің мүшесі болып жұмыс істейді. Сонымен қатар, биыл шілде айында Қостанайда салынып жатқан «Тобыл» көлік-логистикалық кешенінің серіктесі атанды. Қостанай облысының әлеуметтік-экономикалық дамуына қосқан елеулі үлесі үшін Лаврентьев «Құрмет» орденімен марапатталған.

Бұдан бөлек, кәсіпкер Қостанай облысындағы триатлон федерациясының президенті қызметін атқарады.

2025 жылы ол Қазақстандағы ең бай кәсіпкерлер тізімінде 12-орынға тұрақтаған.

Бұған дейін Андрей Лаврентьев «Qarmet» АҚ (бұрынғы ArcelorMittal Temirtau) қаржылық қиындықтарға тап болған «Астана» футбол клубын сатып алуы мүмкін деген ақпаратты жоққа шығарған еді.

Ресми емес деректерге сүйенсек, «Тобыл» клубына инвестор ретінде өзге ірі компания келуі ықтимал.