Қазақстан құрамасына кандидат футболшы «Жеңіске» ауысуға жақын

«Қызылжар» клубының жартылай қорғаушысы Андрей Ульшин мансабын елордалық «Жеңіс» сапында жалғастыруы мүмкін, деп хабарлайды ASnews.kz.

Дереккөз мәліметінше, тараптар трансферге қатысты келіссөздер жүргізіп жатыр. 25 жастағы хавбектің петропавлдық клубпен келісімшарты биылғы жылдың 31 желтоқсанында аяқталады. Осыған байланысты ол жаңа командасына еркін агент ретінде ауысуы ықтимал.

Андрей Ульшин – «Қайраттың» түлегі. Алматылық клубта 81 матч өткізіп, 9 гол соқты, 9 нәтижелі пас берді. Ағымдағы жылдың басында жартылай қорғаушы «Қызылжарға» ауысып, 16 ойында 1 гол мен 1 голдық пастың авторы атанды.

Ульшин – Қазақстанның екі дүркін чемпионы әрі ел Кубогының иегері. Transfermarkt порталы футболшының нарықтағы құнын 150 мың еуроға бағалап отыр.

2024 жылдың қазан айында Станислав Черчесов Ульшинді Қазақстан ұлттық құрамасына Австрия (0:4) және Словениямен (0:1) өткен матчтарға шақырған болатын. Алайда жартылай қорғаушы ұлттық құрама сапында дебют жасай алмай, екі кездесуде де қосалқы құрамда отырды.