Николай Костовтың «Ақтөбеде» қалуға мүмкіндігі артты

Болгариялық маман Николай Костов «Ақтөбе» клубының бас бапкері қызметінде қалуы мүмкін, деп хабарлайды ASnews.kz.

Клуб басшылығы бірқатар шетелдік мамандармен келіссөз жүргізіп жатыр. Солардың ішінде басты үміткер ретінде украиналық Роман Григорчук қарастырылған еді. Алайда клуб тарапынан оның бапкерлік стилі мен ойын философиясына қатысты сұрақтар туындаған. Оның үстіне, Григорчук қазір «Черноморец» клубын тізгіндегелі жатыр, тіпті бапкерлік штабын жасақтап үлгерген екен.

Ал тағы бір украиналық маман Виктор Скрипник бар назарын «Заря» клубындағы жұмысына аударып отыр. Оның жетекшілігімен команда Украина чемпионатының турнирлік кестесінде тұрақты түрде орта тұстан орын алып келеді.

Болгариялық Станимир Стоиловты қоса алғанда, өзге де үміткерлермен келіссөздердің сәтсіз аяқталуы Николай Костовтың «Ақтөбедегі» орнын сақтап қалуына жақсы мүмкіндік беріп отыр. Ол өз келісімшарты бойынша соңына дейін жұмыс жасауға ниетті.

Николай Костов «Ақтөбені» осы жылдың тамыз айында тізгіндеген. Дегенмен оның басшылығымен команда бесінші орын алып, еурокубок жолдамасынан тыс қалды.