Жуков – Сәтпаевтың «Челсиге» ауысуы туралы: алдымен басқа командаға жалға баруды ұсынар едім

Қазақстан құрамасының жартылай қорғаушысы Георгий Жуков BorodAbata.kz сайтына берген сұхбатында Дастан Сәтпаев туралы пікірімен бөлісіп, неліктен талантты ойыншылар еуропалық топ клубтарға ауыспас бұрын дайындық кезеңінен өту керектігін түсіндірді.

«Менің ойымша, Дастан Сәтпаевқа ешкімнің кеңесі керек емес. Бірақ егер оны Бельгияның немесе Нидерландының топ-клубы шақырса, мен «Челсидің» деңгейіне дайындалу үшін сол жерге жалға баруды ұсынар едім. Мысалы, Де Брюйне мен Лукаку да 18 жасында «Челсиге» ауысты, бірақ ол кезде екеуі де шикі еді. Біреуі «Вольфсбургте», екіншісі «Эвертонда» ашылды. Олар сол кезде мықты болғанымен, тәжірибе жетіспеді. Футболшы «Челси» деңгейіндегі клубта өзін сенімді сезіну үшін және психологиялық тұрғыдан дайын болу үшін әртүрлі кезеңдерден өтуі тиіс. Мысалы, «Брюгге» немесе «Генкте» жүріп, бірден Англияның топ-клубына секіріп кету мүмкін емес – ол жақта мүлдем басқа футбол», – деді Жуков.

2026 жылы Қазақстан құрамасының 16 жастағы шабуылшысы Дастан Сәтпаев «Челсиге» ауысады. Биылғы маусымда футболшы «Қайрат» сапында 14 матч өткізіп, 9 гол соқты, 4 ассист жасады.