Сенсация болады деп ойламадым: Алияр Мұхамед – «Оқжетпес», «Астанаға» соққан голы және құрама жайлы

«Оқжетпестің» 24 жасар шабуылшысы Алияр Мұхаммед өткен маусымда 24 ойын өткізіп, үш гол салды және үш голдық пас берді. Премьер-лиганың сенсациясына айналған көкшетаулық командада негізгі рөлдердің бірін атқарып, ұлттық құрамаға да шақырту алды.

ASnews.kz порталының тілшісіне берген сұхбатында Алияр Мұхаммед өткен маусымды бағалады, және:

• ұлттық құрамадағы дебюті жайлы айтып берді;
• «Астанаға» салған ғаламат голын есіне түсірді;
• әрі басқа клубтардан келген ұсыныс жайында әңгімеледі.

– Алияр, «Оқжетпестің» өткен маусымдағы ойынын қалай бағалайсыз? Жалпы, команданың нәтижесіне көңіліңіз тола ма?

– Жалпы алғанда, маусымды оң бағалауға болады. Команда Бірінші лигадан енді ғана келсе де, Премьер-лигада бәсекеге қабілетті екенімізді көрсеттік. Көптеген матчта мінез, тәртіп және ауызбіршілік болды. Әрине, жоғалтқан ұпайлар да бар, бірақ жалпы нәтиже біз үшін жақсы тәжірибе болды деп ойлаймын.

– Жеке өзіңіз үшін маусым қалай өтті? Үш гол соқтыңыз және үш ассист бердіңіз. Өткен маусымға көңіліңіз тола ма?

– Толық қанағаттандым деп айта алмаймын. Әрдайым өзімнен көп нәрсені талап етемін. Дегенмен, командаға пайдалы болуға тырыстым, маңызды сәттерде үлес қостым. Бұл – мен үшін келесі маусымдарға көмек болатын үлкен тәжірибе.

– Биыл сіз алғаш рет ұлттық құрамаға шақырту алып, дебют жасадыңыз. Маусым басында осыны күткен бе едіңіз?

– Шынымды айтсам, бұл мақсат болған, бірақ дәл осылай жүзеге асады деп ойламадым. Мұны күнделікті еңбектің және тұрақты ойынның нәтижесі деп қабылдадым. Бұл мен үшін үлкен жауапкершілік әрі мотивация.

– Ұлттық құрамадағы бәсекелестікті қалай бағалайсыз?

– Бәсекелестік өте жоғары және бұл – қалыпты жағдай. Максим Самородов, Ғалымжан Кенжебек, Дастан Сәтпаев – барлығы да сапалы ойыншылар. Мұндай ортада әр ойыншы дами түседі. Бұл мені де алға жетелейді.

– Ұлттық құрамадағы дебютіңіз Беларуське қарсы ойында болды. Алаңға шыққанда қандай сезімде болдыңыз?

– Ерекше сезім болды. Алғашқы секундтарда аздап қобалжу болды, бірақ ойын басталған соң бәрі ұмытылып, тек футболға назар аудардым. Ел намысын қорғау – үлкен мәртебе.

– Жалпы, халықаралық футболдың деңгейі қандай? Ұлттық құрамадағы ойындардың деңгейі анағұрлым жоғарырақ па?

– Айырмашылық бар. Қарқын, шешім қабылдау жылдамдығы, тактикалық тәртіп әлдеқайда жоғары. Ұлттық құрамадағы ойындар ойыншыны тез шыңдайды.

– «Астанаға» соққан ғаламат голыңызға тоқталсақ. Сол кезде қандай сезімде болдыңыз? Және де сол ойынды жеңуге не жетпеді деп ойлайсыз?

– Ол гол мен үшін есте қаларлық сәт болды. Бірақ футбол – командалық ойын. Сол матчта ұсақ қателіктер көп болды, соңына дейін концентрация жетіспеді деп ойлаймын.

– Ақпан айында «Оқжетпеске» көшкенде, команда бірден Премьер-лиганың сенсациясына айналады деп ойладыңыз ба?

– Бірден сенсация болады деп ойламадым. Бірақ жаттығудағы атмосфераны, жігіттердің мінезін көріп, бұл команданың бәсекеге қабілетті болатынын сездім.

– «Оқжетпестің» осындай ойынының негізгі сыры неде деп айтар едіңіз?

– Бірлік пен сенім. Әр ойыншы өз рөлін түсінді, алаңда бірін-бірі толықтырып ойнады. Бұл – өте маңызды фактор.

– Серікжан Мужиковтың жазда «Оқжетпеске» келуі командаға жақсы жағынан әсер етті ме?

– Әрине. Оның тәжірибесі, алаңдағы сабырлылығы, жастарға деген көмегі команданың ойынына оң әсерін тигізді. Мұндай ойыншылар кез келген командаға пайдалы.

– Жазда сізде топ-клубтардан ұсыныс болды деген ақпарат бар. Бұл ақпарат қаншалықты рас?

– Қызығушылық болды, бірақ ресми деңгейге жеткен жоқ. Сол сәтте мен үшін бастысы – «Оқжетпесте» тұрақты ойнау және даму болды.

– Өткен маусымда қай қарсыласқа қарсы ойнау қиынға соқты?

– «Астана», «Ақтөбе» сияқты командаларға қарсы ойнау әрдайым қиын. Жеке қорғаушыларды атамай-ақ қояйын, бірақ тәжірибелі әрі физикалық тұрғыда мықты ойыншылар көп болды.

– «Оқжетпеспен» жасасқан келісімшартыңыз осы жылдың аяғында бітеді. Клубта қалуды жоспарлап жатырсыз ба?

– Қазір нақты айтуға ерте. Барлығы маусым соңындағы келіссөздерге байланысты. Мен кез келген шешімде өзімнің дамуымды бірінші орынға қоямын.

– Шетелдік лигада ойнап, өзіңіздің бағыңызды сынауға қалай қарайсыз?

– Әр футболшы сияқты, менің де мақсатым бар. Егер лайықты мүмкіндік болса, шетелде өзімді сынап көргім келеді. Бірақ ол үшін күн сайын жұмыс істеу керек.