Жоэль Каямба: «Атырау» басымды әбден қатырды – жанкүйерлер көп нәрсені білмейді

«Атырау» мен Конго Демократиялық Республикасының бұрынғы футболшысы Жоэль Каямба ASnews.kz сайтына берген сұхбатында 2025 жылғы ҚПЛ маусымын қорытындылады.

«Олар менің басымды әбден қатырды. Мен ойнаған жоқпын және жарақат салдарынан қатты қиналдым. Дәрігер мен массажистке ешқандай шағымым жоқ. Олар қолдан келгеннің бәрін жасады, бірақ физиотерапевт жоқ. Жарақат алдыңыз ба? Біткен жерің осы. Синтетикалық алаңда жүгіріп жүргендіктен, жарақат алатының айдан анық. Тез қалыпқа келу мүмкін емес.

Парижге көңілді оралуымның жалғыз себебі – ҚПЛ-дағы орнымызды сақтап қалғанымыз. Көптеген матчтарда ойнай алмасам да, «Атыраудың» бірінші лигада ойнағанын көру жүректі ауыртар еді. Ал жанкүйерлердің бізді қолдағаны... Бұл адамдар футболды шынымен жақсы көреді және олардың клуб ішінде не болып жатқанын білмейтіні өкінішті», – деді футболшы.

«Мұнайшылар» әлі күнге дейін африкалық және басқа да шетелдік ойыншыларға қазан айындағы жалақылары мен бонустарын төлемеген. Футболшы ФИФА-ға шағым түсіруді жоспарлап отыр.

Биыл жазда Қазақстанға оралғаннан бері 33 жастағы конголық футболшы тек үш ойын өткізді. Ол бұған дейін чехиялық «Пардубице», «Опава» және «Виктория» клубтарында, сондай-ақ Түркияның «Самсунспор» және «Болуспор» клубтарында ойнаған.