«Атыраудың» африкалық футболшысы: тіпті ұшып кететін ақшамызды да бермеді

«Атырау» мен Конго Демократиялық Республикасының бұрынғы футболшысы Жоэль Каямба ASnews.kz сайтына берген сұхбатында клубтағы қаржылық жанжал туралы айтып берді.

«Басшылық «Елімайға» қарсы финалдық ойынға (2:3) дейін есеп айырысуға уәде берді, бірақ ешкім ештеңе алған жоқ. Екінші жағынан, біз бұл мәселеге емес, тек ойынға назар аудардық. Кейіннен клуб маусымның аяқталуын атап өту үшін кеш өткізді: біз Астанаға аман-есен жеттік, демалып алдық, бірақ ешқандай ақша түскен жоқ. Содан кейін «Атырауда»: «Бүгін жұма болып қалды. Есеп айырысуды дүйсенбіде қалдырайық» деген әңгіме басталды. Дүйсенбі болды тағы да уәде орындалған жоқ.

Басшылық шетелдіктердің еліне ұшып кететін ақшасын да төлемеген. Мен: «Бұл не болды, жігіттер?» деп ойладым. Толық жауапкершілікпен айта аламын, мен бұл командаға оралғаныма өкінемін», – деді 33 жастағы африкалық футболшы.

«Мұнайшылар» осы жылдың қазан айынан бері шетелдік ойыншыларға жалақы төлемеген. Ойыншылар ҚПЛ-да қалғаны үшін бонус та алмаған.

Каямба осы жазда «Атырауға» оралғанымен, жарақаттарына байланысты тек үш матч қана өткізіп, гол соға алмады.