Роман Григорчук: «Ақтөбе» – дәстүрлері мен керемет жанкүйерлері бар үлкен клуб

«Астананың» бұрынғы бас бапкері Роман Григорчук ASnews.kz сайтына берген сұхбатында отандасы Юрий Вернидубтың «Нефтчиді» тізгіндегеніне қатысты пікір білдірді.

Бұған дейін «Ақтөбе» қызығушылық танытқан Вернидубтың Әзірбайжан клубын таңдағаны хабарланған болатын.

«Иә, мен бәрін білемін. Юрий Николаевич – керемет бапкер. Қазіргі уақытта ол «Нефтчиді» жаттыгтыруда. Ол команданы жоғары деңгейге көтере алады. Мен оған сәттілік тілеймін», – деді Григорчук.

Маман сонымен қатар Украина құрамасының бұрынғы қорғаушысы Тарас Качарабаның «Ақтөбеге» ауысу мүмкіндігін бағалады.

«Мен ешқандай кеңес беруге құқылы емеспін. Қазақстанда бірқатар беделді клубтар бар. «Ақтөбе» – дәстүрлері мен керемет жанкүйерлері бар үлкен клуб. Стадиондағы атмосферасы әрқашан керемет болады. Осындай жанкүйерлері бар команданың футболмен және нәтижелермен қуантқанын қалаймын», – деп атап өтті бапкер.

Юрий Вернидуб «Шерифтің» (Молдова) бас бапкері ретінде Чемпиондар лигасында «Реал Мадридті» жеңген болатын.

Тарас Качарабаға келетін болсақ, 30 жастағы орталық қорғаушы Словакияның «ДАК 1904» командасында ойнайды. Ол бұрын «Славия Прага» командасында ойнап, Чехия чемпионатында топ жарған, сонымен қатар Украина құрамасына шақыртылған.

Роман Григорчукты қазір қазақстандық командалар бас бапкер лауазымына үміткер ретінде қарастырып жатыр. 60 жастағы маман көктемнің соңында Украинаның ЛНЗ клубынан кеткелі бері жұмыссыз жүр.