Оразовтың агенті – «Елімайға» ауысу жайлы: Еуропалық клубтар да қызығушылық танытты

Қазақстан ұлттық құрамасының жартылай қорғаушысы Рамазан Оразовтың бельгиялық агенті Кен Ван Дейк ASnews.kz сайтына берген сұхбатында ойыншының семейлік «Елімаймен» толыққанды келісімшартқа отыруына қатысты пікір білдірді.

«Елімай» Рамазанның «Силькеборгтан» толыққанды ауысуын рәсімдеді. Ол 2027 жылдың соңына дейін жоспарланған екі жылдық келісімшартқа қол қойды. Біз бұл келісімге ризамыз және осы мәміленің жүзеге асуына атсалысқан екі клубқа да – «Елімай» мен «Силькеборгқа» алғыс айтамыз», – деді Ван Дейк.

Сондай-ақ, ойыншының өкілі басқа ұсыныстардың болғанына қарамастан, неліктен таңдау Семей клубына түскенін түсіндірді.

«Соңғы бірнеше айда ол өте жақсы өнер көрсетті, сондықтан, әрине, еуропалық клубтар тарапынан да қызығушылық болды. Бірақ біз «Елімайды» бірнеше ай бұрын басталған істің дұрыс жалғасы деп санаймыз. Мұнда ол командаға алға қойған мақсаттарына жетуге көмектесіп қана қоймай, өзінің жеке амбицияларын да жүзеге асыра алады», – деп атап өтті агент.

Рамазан Оразов маусымды даниялық «Силькеборгта» бастаған, алайда қыркүйек айының басында «Елімайға» жалға берілген болатын. ҚПЛ чемпионатында 10 матч өткізген 27 жастағы қазақстандық футболшы екі гол соғып, екі нәтижелі пас берді.

«Елімай» мен «Силькеборгтан» бөлек, Оразов бұған дейін словениялық «Копер», литвалық «Даугавпилс», ресейлік «Чайка», сондай-ақ «Ақтөбе», «Ақсу», «Тобыл» және «Қайрат» сапында ойнап үлгерді.

Өткен маусымның қорытындысы бойынша «Елімай» Қазақстан чемпионатында төртінші орынға ие болды, бұл командаға келесі маусымда Конференция лигасының іріктеу кезеңінде ойнауға мүмкіндік береді. Семейлік клуб еуропалық жарыста алғаш рет бақ сынамақ.