«Лационың» экс-футболшысы ҚПЛ-ға оралуы мүмкін

Көкшетаулық «Оқжетпес» пен Хорватия U21 құрамасының бұрынғы қорғаушысы Франьо Прце қазақстандық клубтардың назарына ілікті, деп хабарлайды ASnews.kz.

«Петролул» клубының 29 жастағы орталық қорғаушысы ҚПЛ командаларының біріне ауысуы мүмкін. Ойыншы «Оқжетпестен» бірнеше ай бұрын кеткен болатын, бірақ оның агентіне Қазақстанның басқа клубтары хабарласқан:

«Бірнеше клубтың менеджері Франьоны қайтару мүмкін бе деп сұрады. Жалпы алғанда, қызығушылық бар. Ол Қазақстанда өзін жақсы көрсетті: Ферапонтовпен жақсы тіл табысты және Wyscout порталында позициясы бойынша алғашқы үштікке енді», – деді Прценің агенті Эмиль Писаренко.

Прценің румыниялық клубпен келісімшарты 2027 жылдың ортасына дейін жарамды. Қазір ол Көкшетаудағыдан әлдеқайда көп жалақы алады екен.

Ойыншы мансабын «Хайдук» және «Лацио» клубтарында бастады. Кейін «Салернитана» және «Брешия» клубтарында ойнады және «Оқжетпес» сапында 14 матч өткізді.