Журналист – Нөсербаев пен «Ордабасыдағы» жанжал туралы: ол әрдайым келісілген матчтарға қарсы болды

Спорт комментаторы Ербол Қайыров «Ордабасы» клубының спорт директоры Таңат Нөсербаевқа қатысты жағдайға тоқталды. Әлеуметтік желілерде оның клуб басшылығымен, жаттықтырушылармен және ойыншылармен жанжалдасып қалғаны жазылуда, деп хабарлайды ASnews.kz.

«Нөсербаев сөзсіз біздің футболымыздың аңызы. Ойыншы ретінде үлкен табысқа жеткен адам. Мен оның әрқашан келісілген матчтар сияқты нәрселерге қарсы болғанын білемін. Ол «матчты бере сал» деген адамға қарсы шығуы мүмкін еді.

Мен онымен көптен бері байланыста болған жоқпын, бірақ оның жеке және кәсіби қабілеттерін біле отырып, Танаттың «Ордабасыда» күмәнді әрекеттерге баратынына сенбеймін. Бұл сөзімді онымен бірге ұлттық құраманың намысын қорғаған футболшылар растай алады деп ойлаймын.

Мен шетте қалғым келмеді, сондықтан өз пікірімді білдірдім. «Ордабасыдағы» жағдай жақсарады деп үміттенемін», – деді журналист.

Нөсербаев команданы келісілген матчтар өткізді деп айыптап, бұл үшін ойыншылармен жанжалдасып қалған болатын.

Бұған дейін ASnews.kz сайтында Кабо-Верде футболшысы Жоао Паулиньо мен «Ордабасы» ФК арасындағы келісімшарт құжаттары жарияланған болатын.