Нұрдәулетов – маусым қорытындысы жайында: жақсы тәжірибе болды, бірақ өкінетін тұстар да бар

«Оқжетпестің» бас бапкері Қайрат Нұрдәулетов көкшетаулық клубтағы жұмысы туралы айтып, маусымды қорытындылады, деп хабарлайды ASnews.kz Aladop.kz сайтына сілтеме жасап.

Бапкердің айтуынша, «Ертістен» бастап, «Оқжетпеске» дейін маусым оқиғаларға толы және қиын болған:

«Маусымға келетін болсақ, басымыздан біраз жағдай өтті – «Ертістен» бастап, «Оқжетпеспен» аяқтадық. Біраз дүниені түйдік, жақсы сабақ алдық. Жас бапкерміз ғой, үйренетін дүние әлі жетеді. Қалай дегенде де жақсы тәжірибе болды деп ойлаймын. Мақсатымыз - маусым соңындағы матчтарды ұтып, алғашқы алтылыққа іліну болатын. Еурокубокқа да талассақ деп ойладық. Бірақ, футболшыларға ризамын, барлығы өздерін жақсы жағынан көрсетті деп ойлаймын», – деді Қайрат Жұмабекұлы.

Бірақ Нұрдәулетов маусым соңы ойдағыдай болмағанын мойындады:

«Соңына қарай, жігіттерге тәжірибе, күш жетпей қалды ма, білмеймін... Соның салдарынан маусым соңы ойдағыдай болмады. Іштей бір өкініш бар... Әйтсе де, команданың футболға деген көзқарасы, талпынысы тамаша, «өссек, дамысақ» деген ниеттегі футболшылармен жұмыс істедім. Болашақтары жарқын болады деп сенемін».

Қайрат Нұрдәулетов маусым ортасында Андрей Ферапонтов қызметінен кеткеннен кейін «Оқжетпестің» бас бапкері атанды. Клуб 2025 жылғы ҚПЛ маусымын сегізінші орында аяқтады.