Нұрдәулетов – «Оқжетпес» фанаттарынан болған қысым жайлы: менің отбасыма ауыр тиді

«Оқжетпестің» бас бапкері Қайрат Нұрдәулетов көкшетаулық клубтағы кейбір жанкүйерлердің қысымы туралы пікір білдірді, деп хабарлайды ASnews.kz Aladop.kz сайтына сілтеме жасап.

Нұрдәулетовтің айтуынша, ол Көкшетаудағы стадионда да, әлеуметтік желілерде де жанкүйерлердің қысымына тап болған:

«Барлығы демей-ақ қояйын, бірақ жергілікті жанкүйерлер тарапынан біраз қысым болғаны рас. Үйдегі ойындардың өзінде де кейбірі балағат айтып, «кет» деп наразылық білдіріп жатты. Мұның барлығы психологиялық тұрғыда әсер етпей қоймайды ғой. Жалпы, Көкшетауға келгелі сондай бір жағымсыз әсерді сезіндім... Стадионда, әлеуметтік желіде де солай. Оның себебін, түсіне алмай кеттім, бұл, өзіме дейінгі бапкерлерді жақсы көретін, жақтастарының жасап отырғаны ма, жоқ басқа жағдай ма?!» – деді Нұрдәулетов.

Қазақстандық маман аталмыш жағдайдың тек өзіне ғана емес, отбасына да әсер еткенін атап өтті:

«Ал бұл ситуация жалғыз мен ғана емес, әйелім мен балама да жаман әсер етті. Өткендегі жанкүйерлермен кішігірім конфликт болғаннан кейін әлеуметтік желідегі коменттер отбасыма ауыр тиді. Балам кәдімгідей ержетіп қалған, ол да ел қатарлы әлеуметтік желіні оқиды дегендей. Жалғыз біз емес, иә, әрине талай бапкердің басынан өтіп жатыр, бұған тек төзе білу керек. Бұл да тәжірибе, осындайдан өтуіміз керек болған шығар деп қоямын өзімше іштей. Сондықтан, ешкімге өкпем жоқ, жанкүйерлердің арасында қолдап, көмектескендер де болды. Жанкүйердің барлығы жаман деп айта алмаймын».

Қайрат Нұрдәулетов маусым ортасында Андрей Ферапонтов қызметінен кеткеннен кейін «Оқжетпестің» бас бапкері атанды. Клуб 2025 жылғы ҚПЛ маусымын сегізінші орында аяқтады.