Паулиньоның агенті: «Ордабасы» басшылығы келісімшарт бонусының белгілі үлесін талап етті

«Ордабасы» шабуылшысы Жоао Паулиньоның агенті Педро Морейра ASnews.kz сайтына берген сұхбатында Кабо-Верде футболшысының келісімшартын ұзарту бойынша жүргізілген келіссөздер кезінде туындаған жанжал туралы айтты.

Морейраның айтуынша, клубтың техникалық директоры Музаффар Абдулсатаровпен әңгіме бастапқыда тыныш өткен:

«Біз Музаффар Абдулсатаровпен жазда келіссөз жүргізе бастадық. Барлығы жоспар бойынша өтті және біз Паулиньоның келісімшартын тағы алты айға – маусымның соңына дейін ұзартуға келістік».

Дегенмен, біраз уақыттан кейін «Ордабасы» өкілдері Морейраға ерекше талап қойған:

«Басында бәрі жақсы еді, бірақ кейін Музаффар мен клуб президенті Асхат Сейсембектің ақша өндіргісі келетіні белгілі болды. Жаңа келісімшартқа бонус қосылған кезде, олар сол ақшаның бір бөлігін клуб басшылығына беру керек деді. Елестетіп көріңізші: қағаз жүзінде бір ғана сан, бірақ іс жүзінде мүлдем басқа жағдай болып отыр. Бұған менің бірнеше ойыншым таң қалды».

Агент сонымен қатар клуб басшылығының мұндай талапты басқа да ойыншыларға қоятынын мәлімдеді:

«Менің түсінгенім: олар Паулиньомен ғана бұлай жұмыс істеп жатқан жоқ. Олар тек өз пайдасын ойлайды. Бұл жағдай барлық ойыншылардың көңілін қалдырды».

2025 жылғы маусымда Паулиньо Конференция лигасының іріктеу кезеңін, Премьер-лига және Қазақстан кубогын қоса есептегенде, 22 матч (1072 минут) өткізіп, үш гол мен бір нәтижелі пастың авторы атанды.

«Ордабасы» маусымды трофейсіз аяқтап, Қазақстан кубогының финалында «Тобылдан» жеңілді.

Педро Морейра – Жоао Паулиньоның ісін жүргізетін HBFut агенттігінің өкілі.