Байсуфинов: Әшірбек шыққанда Әліп қалай шабуылдаймыз деп сұрады

Қазақстан құрамасының бас бапкерінің міндетін атқарушы Талғат Байсуфинов Бельгиямен өткен ойынды (1:1) қорытындылады, деп хабарлайды ASnews.kz.

«Бүгін Тапаловты тіреуіш жартылай қорғаушы ретінде шығардық. Ол қапталға кеткен кезде, орнын Рамазан Оразов толтырып отырды. Алда үш шабуылшымыз болғандықтан, Максим Самородов жиі артқа түсіп, қорғанысқа көмектесті. Ал шабуылға өткен сәтте факті жүзінде төртінші шабуылшыға айналды. Мұндай ойыншылармен шабуылға көбірек көңіл бөлуіміз керек.

Үзілісте Кенжебек пен Сәтпаев шаршағандарын айтты. Сол себепті оларды ертерек ауыстырдық. Ғалымжан ойын алдында вирус (тұмау) жұқтырып алыпты. Ол енді Фарер аралдарына қарсы матчқа қатыспайды.

Арсен Әшірбекті алаңға жіберген кезде Нұралы Әліп қасыма келіп: «Енді шабуылды қалай ойнаймыз?» – деп сұрады. Бүгін оның бұлай айтуына негіз болды (күліп)», – деді Байсуфинов.

Қазақстан құрамасы ӘЧ-2026 іріктеуіндегі соңғы ойында Бельгиямен тең түсті (1:1). Дастан Сәтпаев ұлттық құрамадағы алғашқы голын соқты.

Осылайша, Қазақстан 8 ұпай жинап, J тобында төртінші орынды иеленді.