Живкович – «Ертістің» ҚПЛ-ға оралуы туралы: мұндай клуб медаль үшін күресуі керек

Сербиялық қорғаушы Стефан Живкович ASnews.kz сайтына берген сұхбатында павлодарлық «Ертіс» командасының Премьер-лигаға оралуы туралы пікірімен бөлісіп, Руслан Есімовтің мансабын аяқтауына қатысты өз ойын білдірді.

«Мен «Ертіс» үшін өте қуаныштымын. Мұндай үлкен клуб әрқашан ҚПЛ-да ойнап, ең жоғары орындар үшін күресуі керек.

Өкінішке орай, менің досым Руслан Есімов мансабын аяқтапты. Ол өте жақсы жігіт және керемет футболшы. Мен оған өмірдегі бар жақсылықты тілеймін. Ең бастысы – оның денсаулығы. Енді футболдан кейін жаңа өмірі басталады», – деді Живкович.

Стефан Живкович Қазақстанда бес жылға жуық уақыт өткізіп, «Ертіс», «Атырау», «Жетісу», «Тұран» және «Қызылжар» командаларында ойнады. Ол Қазақстан Премьер-лигасында (ҚПЛ) 104 ойынға қатысты. Ал Руслан Есімов қазан айында мансабын аяқтайтынын хабарлады.

2025 жылғы маусымда «Ертіс» Бірінші лигада 61 ұпаймен екінші орын алып, ҚПЛ-ға шықты. Ринат Алюетов жаттықтыратын команда 2020 жылдан бері алғаш рет қазақ футболының жоғарғы элитасына оралды.