Алюетов – «Ертіспен» өткізген маусым жайында: ерекше жыл болды

«Ертістің» бас бапкері Ринат Алюетов ASnews.kz сайтына берген сұхбатында павлодарлық клубтың Қазақстан Премьер-лигасына оралуына сеп болған маусымды қорытындылады.

«Маусым ерекше болды: мен командаға маусым ортасында келдім және Премьер-лигаға шығу үшін бір ай ішінде көптеген өзгерістер енгізуге тура келді, дайындық жасауға уақыт болмады. Команда елу пайызға жаңартылды. Қазақстан Премьер-лигасында ойнаған мықты футболшылар келді, басшылық та клубтың алға қойған мақсатына жету үшін бізге көмектесті. Жалпы алғанда, өткен маусымға ризамыз – команда келесі жылы Премьер-лигада ойнайды», – деді Алюетов.

«Ертіс» Бірінші лига маусымын 56 ұпаймен екінші орында аяқтап, Қазақстан Премьер-лигасына тікелей жолдама алды.

Алюетов палодарлық клубты 2025 жылғы маусымның ортасында тізгіндеп, жеті матчқа созылған жеңісті серияны тіркеді.