Алюетов «Ертістің» ҚПЛ-ға шығуы туралы: құрам 70 пайызға дайын

«Ертістің» бас бапкері Ринат Алюетов ASnews.kz сайтына берген сұхбатында Премьер-лигаға оралғаннан кейін құрамды күшейтуге қатысты жоспарларымен бөлісті.

«Қазіргі уақытта демалыстамыз. Лигалар арасындағы айырмашылық жер мен көктей, сондықтан кейбір позицияларлы күшейтеміз, нақты трансферлер жасаймыз. Біздің команда Премьер-лигада ойнауға шамамен 70 пайызға дайын», – деді бапкер.

Алюетовтің айтуынша, көп нәрсе қойылған мақсат-міндеттер мен басшылықтың қолдауына байланысты болады:

«Бәрі басшылықтың бізге қойған мақсаттарына байланысты болады. Бұл туралы айтуға әлі ерте, бірақ клубтың үлкен амбициялары бар».

2025 жылғы маусымда «Ертіс» Бірінші лигада 61 ұпай жинап, екінші орын алды және ҚПЛ-ға шықты. Ринат Алюетов команданы маусым айында тізгіндеген болатын. Павлодарлық ұжым 2020 жылдан бері алғаш рет Қазақстан футболының элитасына оралды.

БАҚ хабарлауынша, «Ертіс» Қазақстан құрамасының бұрынғы капитаны Асхат Тағыбергенге қызығушылық танытуда.