ҚПЛ-да ойнаған италиялық футболшы: «Қайрат» «Интерге» қарсы ойында тосынсый жасауы мүмкін

«Тобылдың» бұрынғы италиялық шабуылшысы Годберг Купер ASnews.kz сайтына берген сұхбатында «Қайраттың» Чемпиондар лигасының төртінші турында «Интерге» қарсы өтетін ойыны жайлы пікірімен бөлісті.

«Әрине, «Қайрат» тосынсый жасауы мүмкін. «Интер» – фаворит, мықты команда және қазір бабында тұр. «Қайрат» Чемпиондар лигасында алғаш рет ойнауда, сондықтан көпшілігі олардың жақсы ойнайтынына сенбейді. Бірақ қазіргі кезде футбол мүлдем басқаша – сіз ешқашан ештеңеге сенімді бола алмайсыз. Әсіресе, үлкен команда кішкентай командамен ойнағанда, адамдар көбінесе қарсыластарын бағаламай жатады, бұл қателік болуы мүмкін.

Мен «Қайраттың» «Реал Мадридке» қарсы ойынын көрдім – олар жақсы ойнады. «Реал Мадрид» басқа деңгейде, тіпті басқа планетада, бірақ «Қайрат» қорыққан жоқ. «Егер олар «Интермен» қорқынышсыз, стресссіз, қарсыластың мәртебесінен және стадион атмосферасынан қорықпай ойнаса, бүкіл әлемдегі жанкүйерлерге нағыз тосынсый жасай алады», – деді Купер.

Купер өткен маусымда «Тобол» сапында ойнап, онымен бірге Қазақстан Суперкубогын жеңіп алды. 2025 жылдың жазында италиялық шабуылшы румыниялық «Стинта Поли» клубымен келісімшартқа отырды.

Чемпиондар Лигасының үш турынан кейін «Қайраттың» бір ұпайы бар, соңғы ойында кипрлік «Пафоспен» тең ойнаған еді. Ал оған дейін «Спортингке» 1:4 және «Реалға» 0:5 есебімен жеңілді.

Төртінші турда алматылық команда сырт алаңда «Интермен» ойнайды. Ойын 5 қарашада Миландағы «Джузеппе Меацца» стадионында өтеді.