Мата – Қалмұрзаның дебюті жайлы: біз оған сендік, ол да өзін жақсы көрсетті

Алматынық «Қайраттың» португалиялық қорғаушысы Луиш Мата ASNews.kz (BorodAbata) тілшісі Өміржан Солтангелдиновке берген сұхбатында «Ақтөбеге» қарсы ойында қақпашының мәжбүрлі түрде ауысқанына қатысты пікір білдірді.

«Жоқ, қақпашының ауысқаны бізге ешқандай әсер еткен жоқ. Көріп отырғаныңыздай, біз гол жібермедік, демек бәрі жақсы. Біз командадағы барлық қақпашыларға сенеміз, олардың әрқайсысы өздерін көрсетуге дайын. Темірланның жарақатынан кейін алаңға Шерхан шығып, өзін жақсы қырынан көрсетті, біз оған сендік», – деді Мата.

Матчтың 10-минутында «Қайраттың» қақпашысы Темірлан Анарбеков Уче Агбомен соқтығысқаннан кейін жарақат алып, алаңнан зембілмен кетуге мәжбүр болды. Оның орнына 18 жастағы Шерхан Қалмұрза шығып, матч аяқталғанша қақпасына гол жібермеді.

Екінші таймда Еркін Тапаловтың пасынан кейін гол соққан Дастан Сәтпаев алматылықтарға жеңіс сыйлады.