«Торпедоның» бас бапкері: «Ордабасының» фаворит екенін білеміз

«Торпедо Кутаисидің» бас бапкері Дирк Шустер BorodAbata.kz сайтына берген сұхбатында Конференция лигасының бірінші іріктеу кезеңіндегі «Ордабасымен» болатын қарымта матч жайлы пікірімен бөлісті.

«Кутаисидегі алғашқы матчқа көңілім толмаса да, қарымта кездесуге жақсы дайындалдық. Иә, көбісі «Ордабасы» жеңіске жетеді деп күткен еді, бірақ біз мінез көрсетіп, 2:3 есебімен жеңіліп жатсақ та, ойынға оралдық.

Төрт гол соққанымызға қуаныштымыз, өйткені бұған дейінгі матчтарда шымкенттіктер өте аз гол жіберген. «Ордабасы» он ойыншымен жүріп, «Астананы» жеңген ойынды еске алсақ жеткілікті.

Біз қарсыласты құрметтейміз, бірақ біздің де өз базамыз, өз іргетасымыз бар. Келесі кезеңге өтуге мүмкіндігіміз бар деп есептейміз. Әрине, біз «Ордабасының» фаворит екенін түсінеміз, бірақ оң нәтижеге жету үшін қолдан келгеннің бәрін жасаймыз», – деді «Торпедоның» бас бапкері.

Алғашқы кездесуде грузиялық ұжым 4:3 есебімен жеңіске жеткен еді, қарымта матч 17 шілдеде Шымкентте өтеді.