«Тобылдың» бұрынғы көшбасшысы Эль-Мессауди: «Партизанды» жеңу – әбден мүмкін

«Тобылдың» және Марокко құрамасының бұрынғы жартылай қорғаушысы Ахмед Эль-Мессауди ASnews.kz басылымына берген сұхбатында қостанайлық клубтың сербиялық «Партизанға» қарсы текетірестегі мүмкіндігін бағалады.

«Келесі кезеңде «Тобылға» толық қолдау білдіремін. Сырт алаңдағы матчтың оңай болмайтыны анық, дегенмен мүмкіндік бар деп ойлаймын. Өз алаңымызда жеңіске жету мүмкіндігін сақтау үшін сыртта гол жіберіп алмауға тырысу керек.

Қостанайда қарсылық көрсету тіпті еуропалық клубтар үшін де оңай шаруа еместігін бәрі біледі. Иә, бұл ең үздік маусым емес. Бірақ, Алла жазса, жігіттер жанкүйерлер мен осы клубтың абыройы үшін келесі кезеңге өтеді. Алға!», – деді 31 жастағы футболшы.

Еске сала кетейік, Конференция лигасының үшінші іріктеу кезеңі аясындағы «Партизан» мен «Тобыл» арасындағы алғашқы матч 6 тамызда Белградта өтеді. Қарымта кездесу – 13 тамызда Қостанайда.

Айта кетейік, плей-офф кезеңінде бұл жұптың жеңімпазы испаниялық «Хетафемен» кездеседі. Ла Лига клубы құрамының жалпы құны 70,5 млн еуроға бағаланған – бұл Қазақстан Кубогының қазіргі иегерлерінің құрамынан (10,48 млн) дерлік жеті есе қымбат.

Ахмед Эль-Мессауди қазіргі уақытта қытайлық «Циндао Хайню» сапында өнер көрсетеді. Дегенмен, марокколық жартылай қорғаушы тобығына жасалған операциядан кейін уақытша команда өтінімінен шығарылған.

«Шектеулер тек ойымызда ғана»: «Тобыл» жартылай қорғаушысы Талал – «Партизанға» қарсы матч туралы