«Левски» «Қайратты» Чемпиондар лигасынан шығарады»: Болгарияда батыл пікір айтылды

ҚПЛ клубтарының бұрынғы болгариялық шабуылшысы Мартин Тошев ASnews.kz басылымына берген сұхбатында Чемпиондар лигасының үшінші іріктеу кезеңіндегі алматылық «Қайрат» пен софиялық «Левски» арасындағы алдағы текетірес туралы пікірін білдірді.

«Левски» өте жақсы бабында, меніңше, қазір оларда басымдық бар. Олар өте мықты матчтар өткізді және қазір өз күштеріне толық сенімді.

«Қайрат» үшін өз алаңындағы ойынның Түркістанда өтетіні онша жақсы емес деп ойлаймын. Ауа райы қарсыласқа қатты әсер етпейді деп санаймын – Болгарияда да қазір күн өте ыстық. Меніңше, «Левски» өз алаңында жақсы нәтижеге қол жеткізіп, алматылықтарды турнирден шығарады», – деді Тошев.

Болгариялық шабуылшы Мартин Тошев ҚПЛ-дың екі клубында өнер көрсетуі арқылы қазақстандық жанкүйерлерге жақсы таныс. Талдықорғандық «Жетісу» сапында ол 28 матч өткізіп, 13 гол соқты және бір нәтижелі пас берді. Сондай-ақ футболшы қарағандылық «Шахтердің» намысын қорғап, онда 17 матчқа қатысып, үш гол соқты.

УЕФА Чемпиондар лигасының іріктеу кезеңі аясындағы «Левски» мен «Қайрат» арасындағы алғашқы матч 4 тамызда Софиядағы «Георги Аспарухов» стадионында өтсе, қарымта кездесу 11 тамызда Түркістанда өтеді.

«Қарсыласты сыйлаймыз, бірақ ешкімнен қорықпаймыз»: Уразбахтин «Левскимен» өтетін матч пен «Қайраттың» трансферлері туралы